Aurten Hidalgobason egin da herritarrei zabaldutako zuhaitz landaketa Arrasaten. Aurreko egun euritsuek geldialdi bat eskaini ziguten pasa den sapatuan zuhaitzak landatzera bertaratu ginenoi. Hego haize bikainaz gozatu genuen, baita eguzki izpi batzuez ere.

Udaleko teknikariak eta Naturtzaindiako bolondresek azaldu genuen nolako garrantzitsua eta beharrezkoa den herrian daukagun espazio honetan basa landare eta animalientzat ondo kontserbatutako espazioa lortzea, baita herritarrek naturarekin kontakturako daukagun behar hori asetzeko basoa zaintzea ere.

Naturtzaindiak Hidalgobaso hobetzeko ekintza planaren baitan jasotako neurrietako bat martxan jarri genuen larunbatean. Zehatz esanda, harizti gazte batean bioaniztasuna handitzeko, zuhaitz ale batzuk moztu ziren eta beste bazuk lehortzeko eraztundu egin ziren, horrela, basoentzako horren beharrezkoa den egur hila sortu zen. Ondoren,  herritarren laguntzaz basoaren ohianpean landare aniztasuna handitzeko mota askotako zuhaixkak landatu genituen; esate baterako: elorri beltzak, elorri zuriak, gurbitzak, basaerramuak, gorostiak, zuhandorrak, erratzak edota hurritzak.

Familia ugari batu ginen bertan eta goiz pasa atsegina igaro genuen, Udalaren kontura egindako hamaiketako eta guzti.

Ea baso gazte honetan egindako esku hartzeak fruitu politak ematen dituen eta Arrasateko Udalak proiektu honi dagokion lekua eskaintzen jarraitzen duen hurrengo urteetan ere!

 

Zorionez Arrasaten aurrera doaz Naturtzaindia Elkarteak sustatutako egitasmoak. Pasa den urtean idatzi genuen proiektu hau, Hidalgobaso kontserbatzearen ingurukoa eta, zorionez,  Arrasateko Udalak lan hori aprobetxatu eta martxan jartzeko erabakia hartu du, oposizioak hala eskatuta. 

Kontserbazio proiektuan ekintza dezente zehazten diren harren, honako hauekin hasteko erabakia hartu da 2017.urtea amaitu aurretik:

• Lursailera ibilgailu motordunetan sartzea ekiditeko ateak jartzea, beheko eta goiko sarreretan.
• Txilardia indartzeko desbroze zehatz batzuk egitea, otearen presentzia gutxitzeko helburuarekin.

2018ko udaberrian honako ekintza honekin hasiko dira:

• Egur hilaren kopurua handitzea hariztiz osatutako azaleran, zuhaitz exotiko bakanak moztuz edo lehortu araziz.

Pozik gaude Udalak neurri hauek hartuko dituelako eta pausoak ematen ari delako bioaniztasunaren  kontsebazioaren bidean. Horrela jarraitzea espero dugu, asko daukagu egiteko eta!

 

Pasa den sapatuan gustora ibili ginen Arrasateko Monterron berdegunean naturan jolasean. Jolastu, etzanda egon, irakurri, lagunekin egon, ohial akrobaziak egin eta bertako landareen bilduma osatu, ere bai!

Arrasateko gazteak uste baino hobeto moldatzen dira zuhaitzak identifikatzen hostoen formari erreparatuta besterik ez! Gainera, bertako animalien irudiak margotu genituen elementu naturalen koloreez baliatuta.

Ondo dago ikustea, lana gidatu beharrik gabe eta denbora lasai emanda, lan aberatsak egin dezaketela haurrek.

Naturtzaindiak parte hartuko du maiatzaren 2Oan Monterronen egingo den «Naturan jolasean» topaketan. Herritarrak naturara hurbiltzeko helbururarekin  antolatu du egun osoko egitaraua Txatxilipurdi Elkarteak herriko beste eragile batzuekin batera (Leintz Eskola Kirola, Besaide Mendizale Elkartea, Olgeta jolaserako zentroa, Arrasateko Gaztetxea eta Naturtzaindia Elkartea) 

Monterronek eskaintzen duen espazio naturala aprobetxatuta jolas libre eta espontaneoaz gozatzeko aukera izango da. Jolas gune honetan material desberdina egongo da parkean zehar eta helburua haurrek modu librean hauek erabili eta jolastea izango da. 

Naturtzaindia elkartearen aldetik, parkeko ekosistema ezagutzeko dinamika bat burutuko dugu, bertako animali eta landareak ezagutzeko eskulan batzuk proposatuz, horrela, parkeak duen aberastasun naturalaz jabetuko gara. 

Han ikusiko garelakoan, animatu berdean heztera!

Gaur, martxoak 21, basoen nazioarteko eguna dela eta, ekosistema hauen garrantziaz pentsarazten jarri gaitu berriz ere.

Izan ere, ezin dugu ahaztu Debagoieneko basoen egoera zein den: azaleraren % 2o,7 besterik ez dute hartzen, eta baso txikiak dira, oso zatikatuak daudenak, gainera.

Lurzoruaren erabileraren mapa honetan ageri dira debagoieneko basoak berde kolorez margotuak, zati handienak, Aizkorri Aratz naturgunean eta Udalatxen, hain zuzen ere.

Bestalde, kolore horiz habitat natural eta erdinaturalak daude (zelaiak, sastrakadiak, harkaiztiak), gorriz, egur landaketak %52,06, eta beltzez, artifizial bihurtutako lurra (herriak, errepideak, hondakindegiak, etab.)

Ikusten denez, ezin gara pozez saltoka jarri egun honetan, gure inguruko basoen egoera ikusita. Hala ere, arrazoiak badaude, lanean jarraitzeko bertako basoen azalera berreskuratzeko eta iadanik dauzkagun basoak altxorra balira bezala zaintzeko!